Indhoweyd ga'dii ka tegey gocashadeediiye
Ma googoynnin maansooyinkii igu gulaalnaaye
Garaadkayga sheekada haddaan gelin ka faalloodo
Gebi maaxday iyo xareed galacle weeyaane
Guuxaygu waa sida libaax kaynta soo galayee
Waa fiinta galabtii cidiyo galawga fiidkiiye
Waxaan uga golleeyahay haddaan idin garwaaqsiine
Xiisahayga gaarka ah haddaan soo gudbiyo caawa
Gu'yaal badan ninkii soo jiree guudka ka cirraystay
Iyo kii garaad lihiba way garan karaayaane
Bal guddooma faallada halkaan uga gol jeexaayo
Guurti talisa, Golaheenna Sare, odayo loo guuxay
Guddidii Af Soomaaligiyo geeshka iyo xoogga
Gobal taliye agaasiimaha guud hawl intii gudata
Dadka ganacsadiyo beeraley nimanka gaadiidka
Dugsiyada kuwaa noo galiyo ubaxa gaagaaban
Oo inay gadaa noo tashaan dhaxalku gaarsiiyo
Gugumaha abeesada gudiyo mici lamaareyda
Iyagoon halaq gooya iyo gocondho eegeynnin
Abaar guun ah meel geed la'iyo gubato qiiqaysa
Giyi ebera jiila! gurracan oo gaaja iyo oon le
Ayagoo an sahay gaarta iyo guuyo badan haysan
Iyagoon gargaar qolo ka rabin garab inay siiyso
Iyagoon gashiga qaadanayn oo gunnimo diiddan
Gobannimada iyagoo harsaday calanka guudkooda
Waxay goobayaanoo hurdada gama'a loo diiday
Inay libin ka gaaraan dhulkii gaaxsanaan jiraye
Allahayow ku guulee hadday gacanta qaadeene.
Subscribe to this comment's feedwritten by Yusuf abdi , August 15, 2011
written by Zakariye sh cabdi xasan warsame surcad , November 28, 2011
written by saciid maxame xirsi , January 01, 2012
written by TaleexDistrict , January 25, 2012
Developed and maintained by